Hua kare jo andhera bahut ghanera hai

hua kare jo andhera bahut ghanera hai
kisi ki zulf tale har samay sawera hai

hikayat-e-lab-o-ruKHsar mein guzar den waqt
jahan mein sirf ghaDi do ghaDi basera hai

jalao ghar ki munDeron pe chashm-o-dil ke diye
bahao git birah ke bahut andhera hai

wo mohtasib ho ki shahna ki mufti-o-qazi
hamara koi nahin hai har ek tera hai

mere dimagh ke KHannas ne pasand kiya
khanDar ke haft-balaon ka jis mein Dera hai

main barg-e-zard hun shayan-e-iltifat nahin
hasin gul ko hasin titliyon ne ghera hai