Ho dil-lagi mein bhi dil ki lagi to achchha hai

ho dil-lagi mein bhi dil ki lagi to achchha hai
laga ho kaam se gar aadmi to achchha hai

andheri shab mein ghanimat hai apni tabish-e-dil
hisar-e-jaan mein rahe raushni to achchha hai

shajar mein zist ke hai shaKH-e-gham samar-awar
jo in ruton mein phale shairi to achchha hai

ye hum se Dubte suraj ke rang kahte hain
zawal mein bhi ho kuchh dilkashi to achchha hai

saza zamir ki chehra bigaD deti hai
KHud apni jun mein ho aadmi to achchha hai

nahin jo lazzat-e-duniya nashat-e-gham hi sahi
mile jo yak-do nafas sarKHushi to achchha hai

safar mein ek se do hon to rah aasan ho
chale jo sath mere bekasi to achchha hai

dayar-e-dil mein mahakte hain phul yaadon ke
rache base jo abhi zindagi to achchha hai

chalo jo kuchh nahin 'baqar' mata-e-dard to hai
use sambhaal ke rakkho abhi to achchha hai