hijr mein itna KHasara to nahin ho sakta
ek hi ishq dobara to nahin ho sakta
chand logon ki mohabbat bhi ghanimat hai miyan
shahr ka shahr hamara to nahin ho sakta
kab talak qaid rakhun aankh mein binai ko
sirf KHwabon se guzara to nahin ho sakta
raat ko jhel ke baiTha hun to din nikla hai
ab main suraj se sitara to nahin ho sakta
dil ki binai ko bhi sath mila le 'gauhar'
aankh se sara nazara to nahin ho sakta
Ghazal
Hijr mein itna KHasara to nahin ho sakta
Afzal Gauhar Rao