حیائے روح گل اعزاز بھی ہے

حیائے روح گل اعزاز بھی ہے
شعور زندگی کا راز بھی ہے

محبت راز اندر راز بھی ہے
کہیں یہ سوز بھی ہے ساز بھی ہے

اسے کیسے نہ دل دے دوں کہ جس میں
وفا بھی حسن بھی انداز بھی ہے

رہ عشق و وفا میں زندگانی
ترانہ بھی ہے سوز و ساز بھی ہے

محبت میں نہ دیکھ انجام اے دل
یہ اک بے انتہا آغاز بھی ہے

تبسم ہی نہیں غارت گر دل
بلائے جاں خرام ناز بھی ہے

دل جوہرؔ ہے اک عاشق کی دنیا
کہ یہ پامال حسن و ناز بھی ہے