hawa ki tez-gamiyon ka inkishaf kya karen
jo dosh par liye ho us ke bar-KHilaf kya karen
yaqin aur guman ki jang se gurez tha nahin
jo faisla kiya hai us se inhiraf kya karen
wo dusron ki aankh ka ghubar to liye rahe
to apne gard gard aaine ko saf kya karen
jo manzilen dikhai thin wo mumkinat mein se thin
par apni himmaton ki barf mein shigaf kya karen
'humaira' e'timad ka pahaD Dher ho gaya
aur ab bhi sochte hain un se iKHtilaf kya karen
Ghazal
Hawa ki tez-gamiyon ka inkishaf kya karen
Humaira Rahman