Hasti ke har ek moD pe aaina bana hun

hasti ke har ek moD pe aaina bana hun
miT miT ke ubharta hua naqsh-e-kaf-e-pa hun

wo dast-e-talab hun jo dua ko nahin uThta
jo lab pe kisi ke nahin aai wo dua hun

is daur mein insan ka chehra nahin milta
kab se main naqabon ki tahen khol raha hun

basti mein basere ka irada to nahin tha
diwana hun sahra ka pata bhul gaya hun

jati hi nahin dil se teri yaad ki KHushbu
main daur-e-KHizan mein bhi mahakta hi raha hun