ہر نفس دیدۂ دل میں تری یادوں کا ہجوم

ہر نفس دیدۂ دل میں تری یادوں کا ہجوم
ہر گھڑی مجھ پہ قیامت کا گزر نا معلوم

آنکھ سے دل میں اترتی ہوئی یادوں کی برات
دشت تنہائی میں ٹوٹے ہوئے تاروں کا ہجوم

اس قدر پاس کہ جیسے مرے دل کی آواز
اس قدر دور کہ جیسے ہو صدائے موہوم

اے دل‌ خاک‌ بسر تیری تباہی تسلیم
ہاں دل سادہ نظر تیری خطائیں معلوم

ہر گھڑی یاد میں گزری شب ماتم کی طرح
پھر بھی اے عشق سیہ پوش انہیں کیا معلوم

کل کا دن اپنی بہاروں کو لیے ختم ہوا
کل کی ہر بات ہوئی نقش وفائے موہوم