EN हिंदी
ہر مرگ آرزو کا نشاں دیر تک رہا | شیح شیری
har marg-e-arzu ka nishan der tak raha

غزل

ہر مرگ آرزو کا نشاں دیر تک رہا

شاہد عشقی

;

ہر مرگ آرزو کا نشاں دیر تک رہا
جب شمع گل ہوئی تو دھواں دیر تک رہا

وہ وقت ہائے سوئے حرم جب چلے تھے ہم
دامان کش خیال بتاں دیر تک رہا

کلیاں اداس پھول فسردہ صبا خموش
اب کے چمن پہ رنگ خزاں دیر تک رہا

مدت گزر چکی پہ خوشا لذت وصال
ہر ماہ وش پہ اس کا گماں دیر تک رہا

دار و رسن کا ذکر چھڑا جب بھی دوستو
آنکھوں میں ایک سرو رواں دیر تک رہا

دیوانے کو تو اپنا بھی رہتا نہیں ہے ہوش
اک نام پھر بھی ورد زباں دیر تک رہا