Hamin wafaon se rahte the be-yaqin bahut

hamin wafaon se rahte the be-yaqin bahut
dil-o-nigah mein aae the mah-jabin bahut

wo ek shaKHs jo dikhne mein Thik-Thak sa tha
bichhaD raha tha to lagne laga hasin bahut

tu ja raha tha bichhaD ke to har qadam pe tere
phisal rahi thi mere panw se zamin bahut

wo jis mein bichhDe hue dil lipaT ke rote hain
main dekhta hun kisi film ka wo scene bahut

tere KHayal bhi dil se nahin guzarte ab
isi mazar pe aate the zaerin bahut

taDap taDap ke jahan main ne jaan di hai 'siraj'
khaDe hue the wahin par tamashbin bahut