hamare KHwab sab tabir se bahar nikal aae
wo apne-ap kal taswir se bahar nikal aae
ye ahl-e-hosh to ghar se kabhi bahar nahin nikle
magar diwane har zanjir se bahar nikal aae
koi aawaz de kar dekh le muD kar na dekhenge
mohabbat tere ek ek tir se bahar nikal aae
dar-o-diwar bhi ghar ke bahut mayus the hum se
so hum bhi raat is jagir se bahar nikal aae
baDi mushkil zaminon mein gulabi rang bharna tha
bahut jaldi bayaz-e-'mir' se bahar nikal aae
Ghazal
Hamare KHwab sab tabir se bahar nikal aae
Haseeb Soz