ہم سے شاید ہی کبھی اس کی شناسائی ہو

ہم سے شاید ہی کبھی اس کی شناسائی ہو
دل یہ چاہے ہے کہ شہرت ہو نہ رسوائی ہو

وہ تھکن ہے کہ بدن ریت کی دیوار سا ہے
دشمن جاں ہے وہ پچھوا ہو کہ پروائی ہو

ہم وہاں کیا نگہ شوق کو شرمندہ کریں
شہر کا شہر جہاں اس کا تماشائی ہو

درد کیسا جو ڈبوئے نہ بہا لے جائے
کیا ندی جس میں روانی ہو نہ گہرائی ہو

کچھ تو ہو جو تجھے ممتاز کرے اوروں سے
جان لینے کا ہنر ہو کہ مسیحائی ہو

تم سمجھتے ہو جسے سنگ ملامت عرفانؔ
کیا خبر وہ بھی کوئی رسم پزیرائی ہو