Humne to ujaD aur basti dekhi

hum ne to ujaD aur basti dekhi
duniya ki sabhi buland aur pasti dekhi

surat pe KHayal apni aaya jis dam
yak lahza habab-war pasti dekhi

kitnon ke maash ki durusti dekhi
kitnon ki ba-KHana faqa-masti dekhi

duniya hai basan qahba KHush-dil ghamgin
roti hai kabhi kabhi to hansti dekhi

jis dast ki main daraaz-dasti dekhi
is dast ki aaKHirash shikasti dekhi

jis ne bastam kiya makan ko tamir
diwar phir us makan ki khisakti dekhi

ba-wasf ayan hai lek bazi KHilqat
is shoKH ki did ko tarasti dekhi

ye turfa hai majra ki kaba-e-dil mein
'afridi' ki hum ne but-parasti dekhi