ہم نے مانا ہمیں برباد کرے گی دنیا

ہم نے مانا ہمیں برباد کرے گی دنیا
کر کے برباد مگر یاد کرے گی دنیا

جب اسے ظلم و ستم ہی میں مزہ آتا ہے
کسی ناشاد کو کیا شاد کرے گی دنیا

دیکھنا یہ ہے کہ ہم اہل جنوں پر کب تک
نت نئے طرز کی بیداد کرے گی دنیا

آج تو اپنی کرامات پہ اتراتی ہے
کل مگر آپ ہی فریاد کرے گی دنیا

دشمنی ہے اسے ارباب وفا سے لیکن
یہ نہ ہوں گے تو انہیں یاد کرے گی دنیا

نہیں معلوم یوں ہی خود کو کہاں تک منشاؔ
قید اخلاق سے آزاد کرے گی دنیا