ہم نے باندھے ہیں اس پہ کیا کیا جوڑ

ہم نے باندھے ہیں اس پہ کیا کیا جوڑ
پر چلا ایک بھی نہ فقرا جوڑ

جوڑتا ہے جو تو محبت کا
ہم سے زنار دار رشتا جوڑ

سر دشمن نہ توڑیئے کب تک
مجھ پہ چلتا ہے وہ ہمیشہ جوڑ

اے رفو گر جو ٹانک جامۂ تن
تار تار اور پرزہ پرزہ جوڑ

ذوالفقار علی کی تجھ کو قسم
سر جدا جس سے ہو وہ فقرا جوڑ

نسبت زلف جیسے سنبل کو
ویسے نافہ کا مشک نافہ جوڑ

ہم اسی کو کہیں گے آئینہ ساز
دے ہمارا جو دل شکستہ جوڑ

مظہرہ بے کا شادؔ اردو میں
جانتا ہوں الف ہی ہے کا جوڑ