Hai irtibaat-shikan daeron mein baT jaana

hai irtibaat-shikan daeron mein baT jaana
chaman ka mauja-e-baad-e-saba se kaT jaana

kiran ke haq mein ye suraj ka faisla kyun hai
jo farsh-e-KHak pukare to dur haT jaana

main par-shikasta na tha baadalon ke bich magar
meri uDan ka zanjir se lipaT jaana

ye saz-o-raKHt-e-dil-e-bahra-mand kya shai hai
tamam bikhre hue dard ka simaT jaana

ye kaun jhank raha tha daricha-e-shab se
ajab saman tha ghane baadalon ka chhaT jaana

kahin pe dast-e-nigarin kahin lab-e-lalin
wo sote sote meri nind ka uchaT jaana

miyan-e-rah ajab pur-faza thi gahri jhil
main Dub jata ki achchha hua palaT jaana