ہاتھ میں خنجر آ سکتا ہے

ہاتھ میں خنجر آ سکتا ہے
یا پھر ساغر آ سکتا ہے

آنکھیں زخمی ہو سکتی ہیں
ذرہ اڑ کر آ سکتا ہے

چھت کے اوپر سونے والے
سورج سر پر آ سکتا ہے

خواب میں آنے والا اک دن
خواب سے باہر آ سکتا ہے

کالا جادو کرنے والا
مشعل لے کر آ سکتا ہے

سارے منظر چھپ سکتے ہیں
ایسا منظر آ سکتا ہے

شاید کوئی آنے والا
لمحہ بہتر آ سکتا ہے

گھر کا رستہ بھولنے والا
چوراہے پر آ سکتا ہے

مٹی ہجرت کر سکتی ہے
دریا چل کر آ سکتا ہے