haalat kya ye tere bichhaDne se ho gae
lagta hai jaise hum kisi mele mein kho gae
aankhen baras gain to sukun dil ko mil gaya
baadal to sirf sukhi zaminen bhigo gae
kitni kahaniyon se mila zindagi ko husn
kitne fasane waqt ki chadar mein so gae
aankhon se nind ruThi to nuqsan ye hua
mere hazaron KHwab mere dil mein so gae
'mansur' muddaton se mujhe un ki hai talash
nafrat ke bij mere chaman mein jo bo gae
Ghazal
Haalat kya ye tere bichhaDne se ho gae
Mansoor Usmani