ghusse ko jaane dije na tewari chaDhaiye
main galiyan bhi aap ki khain ab aaiye
raftar ka jo fitna uTha tha so ho chuka
ab baiThe baiThe aur koi fitna uThaiye
mera to kya dahan hai jo bose ka lun main nam
gali bhi mujh ko dije to goya jalaiye
bola kisi se main bhi to kya kuchh ghazab hua
itni si baat ka na batangaD banaiye
aisa na ho ki jae shitabi se dam nikal
chaak-e-jigar se pahle mera munh silaiye
rakkha jo ek shahid ki turbat pe us ne panw
aai sada ye wan se ki daman uThaiye
bikte hain tere nam se hum ai kamand-e-zulf
tujh ko bhi chhoD dijiye to kis ke kahaiye
us ki gali na maktab-e-tiflan hai 'mushafi'
ta chand jaiye sahar aur sham aaiye
Ghazal
Ghusse ko jaane dije na tewari chaDhaiye
Mushafi Ghulam Hamdani