گل رخوں نے کئے ہیں سیر کا ٹھاٹ

گل رخوں نے کئے ہیں سیر کا ٹھاٹ
گلشن آباد کا بھرا ہے ہاٹ

تیغ ابرو سیں میں شہید ہوا
اس سروہی کا کیا بلا ہے کاٹ

دل میں آ راہ چشم حیراں سیں
کھل رہے ہیں مری پلک کے پاٹ

زہر ہیں اس کوں نعمت الوان
لذت عشق کی جسے ہے چاٹ

نہیں اثر تیر آہ کوں اس میں
دل سنگیں ترا ہے لوہا لاٹ

پنجۂ عشق کے شکنجہ سیں
میں ہوا شش جہت میں بارہ باٹ

اے سراجؔ اشک کے چراغوں کوں
نئے مژگاں سیں ہم نے باندھے ٹھاٹ