Ghar hua gulshan hua sahra hua

ghar hua gulshan hua sahra hua
har jagah mera junun ruswa hua

ghairat-e-ahl-e-chaman ko kya hua
chhoD aae aashiyan jalta hua

husn ka chehra bhi hai utra hua
aaj apne gham ka andaza hua

main to pahuncha Thokaren khata hua
manzilon par KHizr ka charcha hua

rahta hai mai-KHane hi ke aas-pas
shaiKH bhi hai aadmi pahuncha hua

pursish-e-gham aap rahne dijiye
ye tamasha hai mera dekha hua

ye imarat to ibaadat-gah hai
is jagah ek mai-kada tha kya hua

gham se nazuk zabt-e-gham ki baat hai
ye bhi dariya hai magar Thahra hua

is tarah rahbar ne luTa karwan
ai 'fana' rahzan ko bhi sadma hua