ghazal ka silsila tha yaad hoga
wo jo ek KHwab sa tha yaad hoga
bahaaren hi bahaaren nachti thin
hamara bhi KHuda tha yaad hoga
samundar ke kinare sipiyon se
kisi ne dil likha tha yaad hoga
labon par chup si rahti hai hamesha
koi wada hua tha yaad hoga
tumhaare bhulne ko yaad kar ke
koi rota raha tha yaad hoga
baghal mein the hamare ghar to lekin
gali ka fasla tha yaad hoga
hamara haal to sab jaante hain
hamara haal kya tha yaad hoga
Ghazal
Ghazal ka silsila tha yaad hoga
Tufail Chaturvedi