gham sahe ruswa hue jazbaat ki tahqir ki
hum ne chaha aap ko hum ne baDi taqsir ki
rauzan-e-zindan se dar aai hai suraj ki kiran
ban gai naqus-e-azadi sada zanjir ki
KHun ke chhinTe paDe hain shaiKH ki dastar par
shahr ki galiyon se aai hai sada takbir ki
zat ke andar talatum zat ke bahar sukut
maslahat-koshi ne kaisi shaKHsiyyat tamir ki
ghar ke darbanon ne sare ghar pe qabza kar liya
hum ne aankhen kholne mein kis qadar taKHir ki
rasta DhunDo ki manzil zat mein mahsur hai
band darwazon ke bahar hai kiran tanwir ki
Ghazal
Gham sahe ruswa hue jazbaat ki tahqir ki
Sayyad Ashoor Kazmi