فتنہ ساماں ہی نہیں فتنۂ ساماں نکلے

فتنہ ساماں ہی نہیں فتنۂ ساماں نکلے
آپ تو خانہ بر انداز دل و جاں نکلے

بے خودی میں جسے ہم سمجھے ہیں تیرا دامن
عین ممکن ہے کہ اپنا ہی گریباں نکلے

دل پہ دھندلے سے نشاں تھے جو غم دنیا کے
وہ بھی در پردہ نقوش غم جاناں نکلے

پھر وہی ہم وہی بے رونقیٔ دیدہ و دل
حسن کے شعبدے اک خواب گریزاں نکلے

درد محرومئ جاوید بھی اک دولت ہے
اہل غم بھی ترے شرمندۂ احساں نکلے

جن سے آرائش‌ ایماں کی توقع تھی عظیمؔ
حادثہ ہے کہ وہ غارت گر ایماں نکلے