فضائے صحن گلستاں ہے سوگوار ابھی

فضائے صحن گلستاں ہے سوگوار ابھی
خزاں کی قید میں ہے یوسف بہار ابھی

ابھی چمن پہ چمن کا گماں نہیں ہوتا
قبائے غنچہ کو ہونا ہے تار تار ابھی

ابھی ہے خندۂ گل بھی اگر تو زیر لبی
رکا رکا سا ہے کچھ نغمۂ ہزار ابھی

چمن تو خیر چمن ہے نوا گروں کو نہیں
خود اپنی شاخ نشیمن پہ اختیار ابھی

ابھی امید کی سرسوں کہیں نہ پھولی
بسنت کا ہے زمانے کو انتظار ابھی

تہی سبوئی کسی کی یہ کہہ رہی ہے شریفؔ
نظام مے کدہ بدلے گا ایک بار ابھی