fasurdagi ka mudawa karen to kaise karen
wo log jo tere qurb-e-jamal se bhi Daren
ek aisi rah pe Dala hai tere gham ne ki hum
kisi bhi shakl ko dekhen to ruk ke aah bharen
ye kya ki be-sabab aae qaza jawani mein
ye kyun na ho ki tumhaari kisi ada pe maren
shab-e-alam ke bhi hote hain kuchh na kuchh aadab
taDapne wale sahar tak to intizar karen
us ek baat ke baad ab hazar baat karo
ye dil ke zaKHm hain yaro bharen bharen na bharen
subut-e-ishq ki ye bhi to ek surat hai
ki jis se pyar karen us pe tohmaten bhi dharen
kuchh aise dost bhi meri nigah mein hain 'qatil'
ki mujh ko baz rakhen jis se KHud usi pe maren
Ghazal
Fasurdagi ka mudawa karen to kaise karen
Qateel Shifai