فرد عصیاں کو وہ سیاہی دے
جس کی وہ زلف بھی گواہی دے
بے اماں نیم جاں ہوں میری جاں
مجھ کو آغوش جاں پناہی دے
اپنی زلفوں کے سائے میں مجھ کو
ایک شب کی ستارہ جاہی دے
دل کے اجڑے نگر کو کر آباد
اس ڈگر کو بھی کوئی راہی دے
میں نے تعمیر قصر شوق کیا
تو اسے مژدۂ تباہی دے
بخشنے والے گل رخوں کو جمال
مجھ کو سامان خوش نگاہی دے
میں اسیر گمان ظلمت ہوں
اعتماد سحر نگاہی دے
مجرم عشق ہوں مجھے صہباؔ
جو سزا دے وہ بے گناہی دے
غزل
فرد عصیاں کو وہ سیاہی دے
صہبا اختر