ek Dar sa laga hua hai mujhe
wo bina shart chahta hai mujhe
khul ke rone ke din tamam hue
ab mera zabt dekhna hai mujhe
mar raha hun usi sukun ke sath
sans lene ka tajraba hai mujhe
ek jaan ek tan hain hijr aur main
tera aana bhi ab saza hai mujhe
ab main KHamosh hone wala hun
kya koi shaKHs sun raha hai mujhe
chup raha main isi liye 'kanha'
mujh se behtar wo jaanta hai mujhe
Ghazal
Ek Dar sa laga hua hai mujhe
Prakhar Malviya Kanha