dur tak dasht mein ujala hai
jaane kis qahr ka hawala hai
phir ugalne lagi hai aag zamin
phir koi qatl hone wala hai
shahr-e-KHush-baKHt ka makin hun magar
gird mere ghamon ka haala hai
dil ne gham ka alaw lafzon mein
kis mahaarat se aaj Dhaala hai
jurm sarzad hua tha aadam se
mujh ko jannat se kyun nikala hai
teri ek aarzu ne logon ko
kis qadar uljhanon mein Dala hai
ek saza-yafta-e-ishq ne aaj
mansab-e-ishq phir sambhaala hai
phir 'KHayal'-e-sitam-zada mein koi
KHushbu-angez misl-e-lala hai
Ghazal
Dur tak dasht mein ujala hai
Rafique Khayal