دور ہو درد دل یہ اور درد جگر کسی طرح

دور ہو درد دل یہ اور درد جگر کسی طرح
آج تو ہم نشیں اسے لا مرے گھر کسی طرح

تیر مژہ ہو یار کا اور نشانہ دل مرا
تیر پہ تیر تا بہ کے کیجے حذر کسی طرح

نالہ ہو یا کہ آہ ہو شام ہو یا پگاہ ہو
دل میں بتوں کے ہائے ہائے کیجے اثر کسی طرح

آئی شب فراق ہے رات ہے سخت یہ بہت
کیجے شمار اختراں تا ہو سحر کسی طرح

عشق میں دل سے ہم ہوئے محو تمہارے اے بتو
خالی ہیں چشم و دل کرو ان میں گزر کسی طرح