ڈوبتے تاروں سے پوچھو نہ قمر سے پوچھو

ڈوبتے تاروں سے پوچھو نہ قمر سے پوچھو
قصۂ رخصت شب شمع سحر سے پوچھو

کس نے بہلایا خزاں کو گل تر سے پوچھو
گل پہ کیا گزری بہاروں کے جگر سے پوچھو

کون رویا پس دیوار چمن آخر شب
کیوں صبا لوٹ گئی راہ گزر سے پوچھو

رات بھر دیپ سر راہ جلے کس کے لیے
کیوں اندھیرا تھا بھرے گھر میں قمر سے پوچھو

کس کے دامن سے لگی نکہت گل روتی ہے
کون ہوتا ہے جدا جی کے نگر سے پوچھو

ایک آواز تو گونجی تھی افق تا بہ افق
کارواں گم ہے کہاں گرد سفر سے پوچھو