دل سے نکلی ہوئی ہر آہ کی تاثیر میں آ

دل سے نکلی ہوئی ہر آہ کی تاثیر میں آ
مانگ لے رب سے مجھے اور مری تقدیر میں آ

رابطہ مجھ سے دل و جاں کا اگر رکھنا ہے
مجھ سے وابستہ کسی حلقۂ زنجیر میں آ

میں بناتا ہوں تخیل کے قلم سے پیکر
میری تحریر مرے درد کی تصویر میں آ

یہ بھی ممکن ہے کثافت ہی دلوں کی دھل جائے
میری آنکھوں سے جو بہتا ہے اسی نیر میں آ

ڈھل نہ جائے کہیں یہ حسن سخن اے انورؔ
دل یہ کہتا ہے کہ اس زلف گرہ گیر میں آ