دل سنگ نہیں ہے کہ ستم گر نہ بھر آتا

دل سنگ نہیں ہے کہ ستم گر نہ بھر آتا
کرتے نہ اگر ضبط تو منہ تک جگر آتا

تو فاتحہ خوانی کو اگر قبر پر آتا
مرنے سے مرے غیر کا مطلب نہ بر آتا

اے قیس اگر دشت میں تو راہ پر آتا
سو بار تجھے ناقۂ لیلیٰ نظر آتا

تخصیص نہ تھی طور کی اے حضرت موسیٰ
ہر سنگ میں وہ نور تجلی نظر آتا

ہوتی چمن آرائے ازل کی جو مشیت
اپنے شجر عشق کا وقت ثمر آتا

بے کار نہ کر رات بسر منتظری میں
آنا اسے ہوتا تو وہ اب تک اثرؔ آتا