دل نے فریب عشق میں کھائے کہاں کہاں

دل نے فریب عشق میں کھائے کہاں کہاں
درماندگی میں اشک بہائے کہاں کہاں

سجدے کہاں کہاں نہ کئے راہ شوق میں
کعبے قدم قدم پہ بسائے کہاں کہاں

بزم بہار کنج حرم صحن میکدہ
دیوانگی نے حشر اٹھائے کہاں کہاں

ہر منظر-بہار میں تیرا جمال ہے
وحشت سر نیاز جھکائے کہاں کہاں

آغاز غم عروج‌‌ جنوں انتہائے شوق
وہ زندگی میں یاد نہ آئے کہاں کہاں

مظہرؔ شب فراق کی ظلمت نہ دھل سکی
ہم نے چراغ داغ جلائے کہاں کہاں