dil mein rakhta hai na palkon pe biThata hai mujhe
phir bhi ek shaKHs mein kya kya nazar aata hai mujhe
raat ka waqt hai suraj hai mera rah-numa
der se dur se ye kaun bulata hai mujhe
meri in aankhon ko KHwabon se pashemani hai
nind ke nam se jo haul sa aata hai mujhe
tera munkir nahin ai waqt magar dekhna hai
bichhDe logon se kahan kaise milata hai mujhe
qissa-e-dard mein ye baat kahan se aai
main bahut hansta hun jab koi sunata hai mujhe
Ghazal
Dil mein rakhta hai na palkon pe biThata hai mujhe
Shahryar