دل کو نصیب سوز غم گلستاں کہاں

دل کو نصیب سوز غم گلستاں کہاں
ہوتا تو آج ہوتا یہ درد نہاں کہاں

ذوق بہار ہی ہے نہ خوف خزاں مجھے
گم سم ہے اپنے حال میں طبع رواں کہاں

جس سے گلوں کے ضبط کا دامن ہو تار تار
ہے عندلیب تیرا وہ ذوق فغاں کہاں

ہو جائے اب نہ ختم فسانہ فراق کا
ہیں نور صبح رات کی نیرنگیاں کہاں

لے جائے گی صبا مرا پیغام تو مگر
ہوگا سبک ہوا سے مزاج گراں کہاں

لے آئے توڑ توڑ کے تارے فلک سے ہم
لیکن نصیب قوت حسن بیاں کہاں

شاداںؔ نہ ڈھونڈھ عرصۂ غربت میں آسرے
اس میں چمن کی ارزش ارض و سماں کہاں