Dil kitna farebi hai adakar na ho jae

dil kitna farebi hai adakar na ho jae
ye rauzan-dar-rauzan-e-diwar na ho jae

ek KHwab tere wasl ki KHushbu se racha KHwab
ye KHwab mujhe bais-e-azar na ho jae

ye hanste hue log ye mahke hue manzar
ye bhiD kahin waqif-e-asrar na ho jae

dil hai kisi ummid ke sae mein farozan
yak-tarfa tasalli ka saza-war na ho jae

ye waswasa-e-kaun-o-makan hasil-e-tashkik
wo shaKHs kahin mujh mein giraftar na ho jae

'rahil' main kisi sham ka bujhta hua suraj
duniya hi kahin meri azadar na ho jae