dil-girafta hi sahi bazm saja li jae
yaad-e-jaanan se koi sham na KHali jae
rafta rafta yahi zindan mein badal jate hain
ab kisi shahr ki buniyaad na Dali jae
mushaf-e-ruKH hai kisi ka ki bayaz-e-hafiz
aise chehre se kabhi fal nikali jae
wo murawwat se mila hai to jhuka dun gardan
mere dushman ka koi war na KHali jae
be-nawa shahr ka saya hai mere dil pe 'faraaz'
kis tarah se meri aashufta-KHayali jae
Ghazal
Dil-girafta hi sahi bazm saja li jae
Ahmad Faraz