dil dukhon ke hisar mein aaya
jabr kab iKHtiyar mein aaya
de use bhi farogh-e-husn ki bhik
dil bhi lag kar qatar mein aaya
KHub hai ye ikai bhi lekin
jo maza intishaar mein aaya
dekhta hai na puchhna hai koi
ajnabi kis dayar mein aaya
ye to jaanen muqaddaron wale
kaun kis ke madar mein aaya
shaKH par ek phul bhi 'tabish'
mujh se milne bahaar mein aaya
Ghazal
Dil dukhon ke hisar mein aaya
Abbas Tabish