Diwana kar ke mujhko tamasha kiya bahut

diwana kar ke mujh ko tamasha kiya bahut
teri talash ne mujhe ruswa kiya bahut

kya kahiye us ke ru-ba-ru aansu nikal paDe
hum ne to zabt-e-gham ka irada kiya bahut

lekin hamara dida-e-bina bhi kam na tha
haalanki us ne bazm mein parda kiya bahut

bosa jabin ko pa-e-sanam ka na mil saka
laghzish ne be-KHudi ka bahana kiya bahut

suraj ne dhul kirnon ki aankhon mein jhonk di
mat puchh raushni ne andhera kiya bahut

us ki had-e-kamal tayyun na kar sake
ahl-e-KHirad ne us ka ahata kya bahut