diwana hun bikhre moti chunta hun
lamha lamha joD ke sadiyan bunta hun
tanha kamre suna aangan raat udas
phir bhi ghar mein sargoshi si sunta hun
mujh ko dimak chaT rahi hai sochon ki
main apne andar hi andar ghunta hun
hanste phul kahan hain meri qismat mein
main to bas murjhai kaliyan chunta hun
kahne ko KHamosh hai meri zat magar
sunte ko to sab ki baaten sunta hun
'azar' ek mauhum si hai ummid abhi
jis ke sahaare KHwab sunahre bunta hun
Ghazal
Diwana hun bikhre moti chunta hun
Mushtaq Aazar Fareedi