Di hai wahshat to ye wahshat hi musalsal ho jae

di hai wahshat to ye wahshat hi musalsal ho jae
raqs karte hue atraf mein jangal ho jae

ai mere dasht-mizajo ye meri aankhen hain
in se rumal bhi chhu jae to baadal ho jae

chalta rahne do miyan silsila dildari ka
aashiqi din nahin hai ki mukammal ho jae

haalat-e-hijr mein jo raqs nahin kar sakta
us ke haq mein yahi behtar hai ki pagal ho jae

mera dil bhi kisi aaseb-zada ghar ki tarah
KHud-ba-KHud khulne lage KHud hi muqaffal ho jae

Dubti naw mein sab chiKH rahe hain 'tabish'
aur mujhe fikr ghazal meri mukammal ho jae