دی گئی ترتیب بزم کن فکاں میرے لئے
یہ زمیں میرے لئے ہے آسماں میرے لئے
دیدنی ہے خود ہی اپنے دل کے زخموں کی بہار
ہیچ ہے رنگینئ ہر گلستاں میرے لئے
ذوق سجدہ چاہیے کیسا حرم کیسی کنشت
آستان دوست ہے ہر آستاں میرے لئے
جادۂ مہر و وفا میں مر کے زندہ ہو گیا
موت ہے میری حیات جاوداں میرے لئے
عزم کامل کو مرے ہر گام پر منزل ملی
بن گئیں دشواریاں آسانیاں میرے لئے
ہو مبارک حضرت زاہد کو فردوس جناں
ہے دیار دوست خلد جاوداں میرے لئے
ہم نواؤں کو مبارک حلقۂ زلف بتاں
مضطرب زنداں میں ہوں گی بیڑیاں میرے لئے
غزل
دی گئی ترتیب بزم کن فکاں میرے لئے
آسی رام نگری