دیکھ اپنے مائلوں کو کہ ہیں دل جلے پڑے

دیکھ اپنے مائلوں کو کہ ہیں دل جلے پڑے
پژمردہ، دل فسردہ در اوپر ڈھلے پڑے

چکی چلی ہے چرخ کی داناؤ دیکھ لو
دانے بہت ہیں اس میں تو ایسے ڈلے پڑے

اوہو جی دے ہی ڈالو نکال ایسی بھوکھ میں
تم کن تو ہیں سموسے بہت سے تلے پڑے

جب گر پڑوں ہوں پاؤں پہ کہتے ہو منہ کو پھیر
تم چھوڑ سب کو پند ہمارے بھلے پڑے

جوں جانوں بے کسوں کے تئیں اب نباہ لو
ہم سب طرف سے ہار تمہارے گلے پڑے

تیرا ہو بول بالا سمجھ بوجھ شعر کہہ
دیکھ اظفریؔ نہ بات ہماری تلے پڑے