dasht mein KHak uDate hain dua karte hain
hum qalandar jahan jate hain dua karte hain
yar to yar hain dushman bhi sada dur rahen
ishq se jaan chhuDate hain dua karte hain
ye saliqa ki mohabbat ne sikhaya hai hamein
zaKHm hanste hue khate hain dua karte hain
tera dil shad rahe aur tu aabaad rahe
hum tujhe chhoD ke jate hain dua karte hain
hum kabhi dar-o-rasan par kabhi zindanon mein
jaan ki bazi lagate hain dua karte hain
ghaalib-o-mir se nisbat ka sharaf hasil ho
aao ab hath uThate hain dua karte hain
Ghazal
Dasht mein KHak uDate hain dua karte hain
Hashim Raza Jalalpuri