dasht ki viraniyon mein KHema-zan hota hua
mujh mein Thahra hai koi be-pairahan hota hua
ek parchhain mere qadmon mein bal khati hui
ek suraj mere mathe ki shikan hota hua
ek kashti gharq meri aankh mein hoti hui
ek samundar mere andar maujzan hota hua
juz hamare kaun aaKHir dekhta is kaam ko
ruh ke andar koi kar-e-badan hota hua
mere sare lafz meri zat mein khoe hue
zikr us ka anjuman-dar-anjuman hota hua
Ghazal
Dasht ki viraniyon mein KHema-zan hota hua
Salim Saleem