درد و غم رنج و الم آہ و فغاں

درد و غم رنج و الم آہ و فغاں
سرگزشت عشق کی ہیں سرخیاں

دل ہے میرا مائل فریاد آج
دیکھ کر ان کے تغافل کا سماں

اک ذرا رک جائیے سن لیجئے
اس دل رنجور کی بھی داستاں

آپ نے تو اک نظر دیکھا فقط
جل گیا تاب و تواں کا آشیاں

اے دل غمگیں نہ رو اس دور میں
کون سنتا ہے کسی کی داستاں

آتش الفت تو کب کی جل بجھی
رات دن سینے سے اٹھتا ہے دھواں

نظم مے خانہ بدل کر رکھ دیں ہم
آؤ اے زندہ دلاں تشنہؔ لباں