درد دل کو داستاں در داستاں ہونے تو دو

درد دل کو داستاں در داستاں ہونے تو دو
شہر قاتل میں ذرا امن و اماں ہونے تو دو

میری آہ نیم شب منزل نمائے شوق ہے
نالۂ دل کو رحیل کارواں ہونے تو دو

اور بھی نا قدر دانی ہنر یاد آئے گی
ہم نشینوں کو ملال رفتگاں ہونے تو دو

دل ادھر مائل ہوا ہی تھا کہ وحشت بڑھ گئی
اس کی چاہت کو ذرا آتش بجاں ہونے تو دو

خانۂ بے رنگ بھی ہے شیشۂ صد رنگ بھی
دل کو پہلے بے نیاز این و آں ہونے تو دو

سرخیٔ خون تمنا آبروئے عشق ہے
آرزوؤں کا لہو رنگ بیاں ہونے تو دو

ہے نہاں مشق سخن میں فکر و فن اوج سخن
ہاں زمین شعر کو برقؔ آسماں ہونے تو دو