ChoT nai hai lekin zaKHm purana hai

choT nai hai lekin zaKHm purana hai
ye chehra kitna jaana-pahchana hai

sari basti chup ki dhund mein Dubi hai
jis ne lab khole hain wo diwana hai

aao us suqraat ka istiqbaal karen
jis ne zahr ke ghunT ko amrit jaana hai

ek ek kar ke sab panchhi dam toD gae
bhari bahaar mein bhi gulshan virana hai

apna paDaw dasht-e-wafa be-ab-o-giyah
tum ko to do chaar qadam hi jaana hai

kal tak chahat ke aanchal mein lipTa tha
aaj wo lamha KHwab hai ya afsana hai