Chhupe hue the jo dil mein wo Dar purane the

chhupe hue the jo dil mein wo Dar purane the
ki raste the nae ham-safar purane the

main uD raha tha faza mein ek ehtiyat ke sath
mujhe KHabar thi mere baal-o-par purane the

tamam-shahr nai raushni mein tha malbus
magar gharon ke sabhi baam-o-dar purane the

mujhe talash hamesha nae charaghon ki thi
ki aasmanon ke shams-o-qamar purane the

thi jin ki lau se dayar-e-suKHan mein tabani
wo taq taq charagh-e-hunar purane the