چھوڑ کر اپنی زمیں اپنا سمندر سائیں

چھوڑ کر اپنی زمیں اپنا سمندر سائیں
میں بہت دور سے آیا ہوں ترے گھر سائیں

کوئی بیری بھی نہیں کانچ کا برتن بھی نہیں
پھر مرے صحن میں کیوں آتے ہیں پتھر سائیں

برف کی گود میں پلتے ہوئے خاموش چنار
غیر موسم میں سلگ اٹھتے ہیں اکثر سائیں

پھول بن جاتے ہیں ہاتھوں میں مرے بچوں کے
میری ٹوٹی ہوئی دیوار کے پتھر سائیں

ہو گئیں شہر کی سڑکیں تو کشادہ بھی مگر
اب کہاں جائیں یہ فٹ پاتھ کے بستر سائیں

میں تو پورس کی طرح جنگ لڑا اور ہارا
تو بنا جنگ ہی بن بیٹھا سکندر سائیں

لے کے آیا ہے ازل ہی سے نظر صدیقیؔ
ٹوٹے کاسہ کی طرح اپنا مقدر سائیں